（520精選浪漫愛情電影）
《西遊記大結局之仙履奇緣》
「三次我愛你」
—
「曾經有一份至真嘅愛情擺喺我面前，我冇珍惜。到冇咗嘅時候，先至後悔莫及。塵世間最痛苦，莫過於此。如果個天可以俾個機會我返轉頭嘅話，我會同個女仔講三個字：我愛你。如果係都要喺呢份愛加上一個期限，我希望係一萬年。」—— 至尊寶
—
「我愛你」，係好易講出口嘅三個字，
但曾經滄海難為水，要真正做到，好難。
—
喺套戲入面，至尊寶同紫霞仙子講咗三次銘心刻骨嘅「我愛你」。第一次係當紫霞仙子知道咗至尊寶要娶牛魔王個妹香香為妻嘅時候，至尊寶為咗倖免於紫霞奪命嘅一劍，可以返去搵自己嘅老婆白晶晶，所以向朱茵講咗呢個大話。
—
第二次係當紫霞仙子被牛魔王迫婚，至尊寶亦唔好彩咁被春三十娘殺死，佢發現原來紫霞喺自己心入面留低咗一滴眼淚嘅時候。
—
至尊寶終於發現，原來愛唔一定要有原因，唔一定可以解釋到，可以係宿命，係一種無以名狀嘅感受。正如佢唔明點解自己腳板會有三粒星，唔明點解喺佢昏迷嘅時候，會嗌咗紫霞個名784次咁多。所以至尊寶決定戴上金剛圈，化身成為孫悟空去救自己嘅一生所愛。
—
第三次講「我愛你」，係紫霞死咗嘅五百年之後。夕陽武士同姣好姑娘企喺城牆之上對峙，雙方愛理不理，一段大好姻緣快將破裂，睇到人咬牙切齒。喺呢一刻，轉生成為咗孫悟空嘅至尊寶，上咗夕陽武士嘅身，同姑娘深情擁吻，對轉世嘅紫霞講咗句「我愛你」。
—
呢三次「我愛你」，一次係離譜嘅大話，一次係自言自語，到最後一次先係真真正正同對方講嘅真心話。人總要喺失去嘅時候先至識後悔，先至明白珍惜嘅重要，至尊寶為咗「愛」，所以「不愛」，從而去彰顯最偉大嘅「愛」。五百年後投胎轉世，佢做到嘅只係上夕陽武士嘅身，巧施小技，令兩個轉世嘅人得以相愛，還呢五百年一個奇蹟。至尊寶由欺騙感情，到了解感情，再到放開對感情嘅執著，最後瀟灑轉身，頭也不回。犧牲自己，成就大愛，終幕嘅金剛圈無再收緊，證明係至尊寶已經看破紅塵。係狗，係怪物？仲緊要咩？
—
至尊寶因為對紫霞仙子嘅愛而踏上取西經之路，令我諗起中唐詩人元稹《離思五首》之四嘅最後一句：「半緣修道半緣君」，人之所以會成為今日嘅自己，一半係因為志向，而另一半就係因為佢所珍重嘅嗰個人。有情、無情、風流、下流，每個人嘅背後，都有自己銘心刻骨嘅故事。
Search